ايش به الذيب يعوي ( الشاعرامين ابومازن)

سألت نفسي ويش به الذيب يعوي
ماشفت قبل اليوم عوي الذيابه
صوته وصوت الرعد ياخوك يدوي
ايش به كتوم الذيب وش هو مصابه
ويش الذي يسوي وما عاد يسوي
وكان  يسوى  قبل  ينزل  نصابه
عزالله ان الوقت بالناس يلوي
هذا الزمن عُرّي  وفسّخ  ثيابه
رد الذي قدكان واقف  بحدوي
قد لوث  المشرب   جناح  الذبابه
واسمع نصيحه صادقه لنت بدوي
خذ من صفات الحر وامن جنابه
واضوي اذا داجت عتاتيمها اضوي
وسكر على هرج المخاليق  بابه
عيوب بعض الناس بالهرج تكوي
وعيوبها  جيفه   بريح  الطيابه
سمومها يا عالي  القدر عضوي
يقتل  نسيج  العز  ناقع عبابه
قطعت هرجه بعدماكان ينوي
يزيد قلت العفو  جات الاجابه
انشهد انك  ما تعديت  هقوي
ياحي بطنن ضم صقرن وجابه
مادام مثلك باقي العز  مقوي
وكم من امثالك  لراسي عصابه
وراح في دربه وانا ادليت دولي
وارختها  شعرً  مصفى شرابه
وازكا الصلاه تبلغ شفيعي وهدوي
طه مع  آله  وجمع  الصحابه